संघीय संसदका पाँच वटा समितिको बैठक आज बस्दै छन् । आज सार्वजनिक लेखा, अर्थ, उद्योग तथा वाणिज्य र श्रम तथा उपभोक्ता हित, कानुन, न्याय तथा मानवअधिकार र कृषि, सहकारी तथा प्राकृतिक स्रोत समितिको बैठक बस्न लागेको हो ।

बिज्ञापन

सर्वजनिक लेखा समितिमा उद्योगहरूले तिर्न बाँकी विद्युतको बक्यौता र नेपाल विद्युत् प्राधिकरणले ती उद्योगमा काटेको बिजुली लाइनको विषयमा छलफल भइरहेको छ । समितिले उद्योगले तिर्न बाँकी बिलको प्रमाण प्राधिकरणसँग मागेको थियो । त्यसको प्रमाण प्राधिकरणले समितिमा पठाएको छ । त्यसपछि समितिको बैठक बस्न लागेको हो । आज दिउँसो १ बजे बस्ने गरी बैठक बोलाइएको छ । त्यस्तै अर्थ समितिको बैठक बिहान ११ बजे बस्ने गरी बोलाइएको छ । बैठकमा बैंकिङ कसूर तथा सजाय (दोस्रो संशोधन) विधेयक, २०८० माथि अर्थमन्त्रीसँग छलफल हुनेछ भने विविध विषयमा पनि छलफल हुनेछ ।

बिज्ञापन

बिहान साढे ११ बजे बस्ने उद्योग तथा वाणिज्य र श्रम तथा उपभोक्ता हित समितिको बैठकमा त्रिभुवन अन्तर्राष्ट्रिय विमानस्थलभित्र रहेको नेपाल आयल निगमको इन्धन भण्डारणको स्थानान्तरण सम्बन्धमा छलफल हुनेछ । त्यस्तै संसदीय अध्ययन तथा सुझाव समितिले पेट्रोलियम पदार्थको आपूर्ति र वितरण व्यवस्थालाई व्यवस्थित गर्न अध्ययन गरी राय सुझावसहितको प्रतिवेदन २०७१ ले वैकल्पिक ऊर्जाको रूपमा इथानोलको सम्भाव्यता अध्ययन गर्ने सम्बन्धमा दिएको निर्देशनको हालसम्मको कार्यान्वयनको अवस्थाका बारेमा छलफल हुनेछ । त्यस्तै पेट्रोलियम पदार्थमा मिसावट गरी प्रयोग गर्न सकिने इथानोलको उत्पादक कियान केमिकल इन्डस्ट्रिजको निवेदनमाथि छलफल हुनेछ भने विविध विषयमा पनि छलफल हुनेछ ।

त्यस्तै बिहान ११ बजे बस्ने कानुन, न्याय तथा मानवअधिकार समितिमा विधायन सम्बन्धमा व्यवस्था गर्न बनेको विधेयकमाथि दफावार र विविध विषयमा छलफल हुनेछ । त्यस्तै दिउँसो १ बजे बस्ने कृषि, सहकारी तथा प्राकृतिक स्रोत समितिको बैठकमा भूमि, व्यवस्था, सहकारी तथा गरिबी निवारण मन्त्रालयबाट सम्पादन हुने कार्यहरूको प्राथमिकता, कार्यक्रम तथा कार्ययोजना, कार्यसम्पादनमा रहेका समस्या, मन्त्रालयमा बजेटलगायत तथा विविध विषयमा छलफल हुनेछ ।

बिज्ञापन