ताजा
लोकप्रिय
बिज्ञापन
भारतबाट आयात हुने पेट्रोलियम पदार्थको मूल्य वृद्धि भए पनि नेपाल आयल निगमले हालको खुद्रा बिक्री मूल्य यथावत् राख्ने निर्णय गरेको छ। आसन्न चाडपर्वलाई लक्षित गर्दै उपभोक्तामा मूल्य वृद्धिको थप भार नपरोस् भन्ने उद्देश्यले यस्तो निर्णय गरिएको निगमले जनाएको छ।
बिज्ञापन
नेपाल आयल निगमका अनुसार, भारतीय आपूर्तिकर्ता इन्डियन आयल कर्पोरेसनबाट असोज १४ गते प्राप्त नयाँ खरिद मूल्यअनुसार पेट्रोलमा प्रतिलिटर ०.२४ रुपैयाँ, डिजेलमा २.३५ रुपैयाँ, मट्टीतेलमा २.३९ रुपैयाँ, हवाई इन्धनमा ३.३९ रुपैयाँ र एलपी ग्यासमा प्रतिसिलिन्डर ३.६० रुपैयाँले मूल्य बढेर आएको हो।
तर निगमले यी मूल्य वृद्धिलाई खुद्रा बिक्री मूल्यमा समायोजन नगरी, उपभोक्ता मूल्य यथावत् राख्ने निर्णय लिएको हो। मंगलबार जारी विज्ञप्तिमा निगमले उल्लेख गरेको छ, “आसन्न चाडपर्वको अवसरमा पेट्रोलियम पदार्थ तथा ग्यासको मूल्यमा वृद्धि गर्दा आम उपभोक्ता वर्गमा पर्न जाने मूल्य वृद्धिको चापलाई कम गर्न र मूल्य स्थिरता कायम गरी मुलुकभर सहज आपूर्ति सुनिश्चित गर्न साबिकको मूल्यलाई निरन्तरता दिइएको हो।”
बिज्ञापन
यसअघि पनि चाडपर्वका अवसरमा निगमले मूल्य स्थिर राख्दै आयात मूल्य वृद्धिको बोझ आफैंले व्यहोर्दै आएको छ।
