बिज्ञापन

बिज्ञापन

अमेरिकी प्रविधि र ई–व्यापार कम्पनी अमेजनले करिब १४ हजार सेतोपोश (कर्पोरेट) कर्मचारीलाई बिदा गर्ने निर्णय गरेको पुष्टि गरेको छ। कोभिड–१९ महामारीका समयमा गरिएको अत्यधिक भर्तीलाई सन्तुलनमा ल्याउने उद्देश्यले कम्पनीले यो कदम चालेको बताइएको छ।

एआई प्रविधिको असर

बिज्ञापन

ब्रिटिस पत्रिका द गार्जियन का अनुसार, सन् २०२५ को सुरुवातमै अमेजनका प्रमुख कार्यकारी अधिकृत (CEO) ले आफ्ना सेतोपोश कर्मचारीहरूलाई चेतावनी दिएका थिए—कृत्रिम बुद्धिमत्ता (AI) ले उनीहरूको जागिर जोखिममा पार्न सक्छ।

अक्टोबर २८ मा अमेजनकी वरिष्ठ उपाध्यक्ष बेथ गालेत्तीले कर्मचारीहरूलाई पठाएको आन्तरिक सन्देशमा लेखेकी छिन्, “आज हामीले सार्वजनिक गरेका कटौतीहरू कम्पनीलाई अझ सुदृढ बनाउने हाम्रो प्रयासको निरन्तरता हुन्। हामी अनावश्यक तहहरू हटाउँदैछौँ, प्रक्रियालाई सरल पार्दैछौँ र स्रोतहरूलाई ती क्षेत्रमा केन्द्रित गर्दैछौँ जहाँ ग्राहकका वर्तमान र भविष्यका आवश्यकतामा सबैभन्दा बढी प्रभाव पार्न सक्छौं।”

इतिहासकै ठूलो छँटनी

अक्टोबर २७ मा Reuters र The Wall Street Journal ले उद्धृत गरेका स्रोतहरूका अनुसार, अमेजनले ३० हजारसम्म कार्यालय कर्मचारी कटौती गर्ने तयारी गरिरहेको थियो। CNBC ले यसलाई अमेजनको इतिहासकै सबैभन्दा ठूलो छँटनीको रूपमा उल्लेख गरेको छ।

हाल अमेजनमा विश्वभर करिब १५ लाख ५० हजार कर्मचारी कार्यरत छन्। तिनमध्ये झण्डै ३ लाख ५० हजार कर्पोरेट कर्मचारी छन्, जसमा यो छँटनीले महत्वपूर्ण असर पार्ने अनुमान गरिएको छ। गालेत्तीले थप लेखेकी छिन्,“एआई प्रविधि इन्टरनेटपछि देखिएको सबैभन्दा रूपान्तरणकारी प्रविधि हो। यसले कम्पनीहरूलाई विद्यमान बजार र नयाँ क्षेत्रहरूमा अभूतपूर्व तीव्रताका साथ नवप्रवर्तन गर्न सक्षम बनाएको छ।”

विशेषज्ञहरूका अनुसार, अमेजनको यो कदमले कम्पनीको सञ्चालन खर्च घटाउने र प्रविधिमुखी कार्यशैलीतर्फ ध्यान केन्द्रित गर्ने रणनीतिक संकेत गर्छ। तर, अर्कोतर्फ यसले हजारौं कर्मचारीको रोजगारीमा अनिश्चितता र मनोवैज्ञानिक दबाब सिर्जना गरेको छ।उद्योग विश्लेषकहरूको भनाइमा, “अमेजनको यो निर्णय विश्वव्यापी श्रम बजारमा एआई प्रविधिले ल्याउन लागेको संरचनात्मक परिवर्तनको एउटा प्रारम्भिक संकेत” हो।