नेपाल उद्योग वाणिज्य महासंघले देशभर बढ्दो आन्दोलन र प्रदर्शनका बीच निजी क्षेत्रको सम्पत्ति र उद्यममा भइरहेको तोडफोडप्रति गम्भीर चिन्ता व्यक्त गरेको छ। व्यवसायहरू निर्बाध रूपमा सञ्चालन गर्न आवश्यक शान्ति र सुरक्षाको सुनिश्चितता गरिनुपर्ने माग गर्दै महासंघले सरकार तथा सरोकारवालाहरूको ध्यानाकर्षण गराएको हो।

बिज्ञापन

महासंघले पछिल्लो केही दिनमा विभिन्न उद्यमी, व्यवसायीका उद्योग, प्रतिष्ठान, कार्यालय तथा निजी निवासमा भएको तोडफोड र आगजनीका घटनाहरूको कडा निन्दा गरेको छ। महासंघद्वारा जारी विज्ञप्तिमा भनिएको छ, “व्यावसायिक एवं व्यक्तिगत सम्पत्तिमाथि भएका यस्ता आक्रमणहरू अस्वीकार्य छन्। यस्ता घटनाको पुनरावृत्ति नहोस् भन्ने सुनिश्चितता आजको आवश्यकता हो।”

बिज्ञापन

पुनर्निर्माणमा निजी क्षेत्रको महत्त्वपूर्ण भूमिका

महासंघले देशको नवर्निर्माण तथा समृद्धिको यात्रामा निजी क्षेत्र प्रमुख स्रोत रहेको उल्लेख गर्दै त्यसका गतिविधि सहज रूपमा सञ्चालन हुने वातावरण बनाउन जोड दिएको छ। “यदि निजी क्षेत्र असहज भयो भने अर्थतन्त्र थप जटिल बन्छ र राजस्वमा समेत गम्भीर असर पर्न सक्छ,” महासंघले चेतावनी दिएको छ।

बिज्ञापन

युवाहरूको आवाजप्रति महासंघको सम्मान

देशभर भइरहेको आन्दोलनमा युवा पुस्ताले उठाएका मुद्दाहरू-जसमा सुशासन, भ्रष्टाचार नियन्त्रण, वाक् स्वतन्त्रता, मर्यादित रोजगारी, स्वरोजगार र राजस्वको सदुपयोगजस्ता विषयहरू छन्—प्रति महासंघले गहिरो चासो व्यक्त गरेको छ। यस्ता मागहरू यथाशीघ्र सम्बोधन गरिनु आवश्यक रहेको महासंघको भनाइ छ।

महासंघले अपेक्षा गरेको छ कि युवा पुस्ताको चाहना अनुसार देश समुन्नतिको यात्रामा अघि बढ्नेछ। शान्ति, समन्वय र सहकार्यको माध्यमबाट अन्योल अन्त्य गरी सुशासन कायम गर्न महासंघ प्रतिवद्ध रहेको विज्ञप्तिमा उल्लेख छ।