बिज्ञापन

चालु आर्थिक वर्ष २०८२/८३ को पहिलो त्रैमास (साउनदेखि असोजसम्म)मा नेपालको निर्यात उल्लेखनीय रूपमा बढेको छ। भन्सार विभागका अनुसार गत आर्थिक वर्षको पहिलो त्रैमासको तुलनामा यस वर्ष निर्यात ८९.६४ प्रतिशतले वृद्धि भएको हो।

बिज्ञापन

भटमास र सूर्यमुखी तेलको आयात–निर्यात नै यस अवधिको प्रमुख व्यापारिक गतिविधि बनेको छ। विभागका तथ्यांक अनुसार, तीन महिनाको अवधिमा ३० अर्ब २४ करोड ८७ लाख रुपैयाँ बराबरको भटमासको कच्चा तेल आयात गरिएको छ भने सोही अवधिमा ३० अर्ब ६९ करोड ७८ लाख रुपैयाँ बराबरको भटमासको तयारी तेल निर्यात गरिएको छ।

यस्तै, चार अर्ब ३३ करोड २८ लाख रुपैयाँ बराबरको कच्चा सूर्यमुखी तेल आयात भएको छ। सोही अवधिमा दुई अर्ब १३ करोड ९५ लाख रुपैयाँ बराबरको सूर्यमुखी तेल निर्यात गरिएको भन्सार विभागले जनाएको छ। यद्यपि निर्यात बढे पनि वैदेशिक व्यापारघाटा घटेको छैन। विभागका अनुसार चालु आर्थिक वर्षको पहिलो त्रैमासमा व्यापारघाटा १२ प्रतिशतले बढेको छ। सो अवधिमा कुल पाँच खर्ब ४० अर्ब ८६ करोड ६१ लाख रुपैयाँ बराबरको वैदेशिक व्यापार भएको छ।

बिज्ञापन

जसमा चार खर्ब ६८ अर्ब आठ करोड रुपैयाँ बराबरको आयात र ७२ अर्ब ७८ करोड २८ लाख रुपैयाँ बराबरको निर्यात भएको विभागले जनाएको छ। नेपालको निर्यात वृद्धिमा तेलजन्य उत्पादनको पुनःनिर्यातले महत्वपूर्ण भूमिका खेलेको देखिन्छ।