ताजा
लोकप्रिय
बिज्ञापन
धनकुटा नगरपालिका–९ का किसान छविप्रसाद रोइलाको जीवनमा प्रविधिको प्रयोगले नयाँ परिवर्तन ल्याएको छ। घरमै कम्बाइन मिल जडान गरेपछि अब उनले ढिकी–जाँतो चलाउनुपर्ने बाध्यता हटेको छ। धान, मकै, कोदो जस्ता अन्न घरमै पिस्न पाउँदा समय र श्रम दुबै बचत भएको उनले बताए।
बिज्ञापन
यस्तै, स्थानीय किसान टेकबहादुर खत्रीले मिनीटिलर प्रयोग गर्न थालेपछि खेती सहज र द्रुत बनेको बताएका छन्। पहिलेको तुलनामा खेतीमा लाग्ने खर्च र समय घटेको र बचत भएको समय अन्य काममा प्रयोग गर्न पाएको उनको भनाइ छ।
पछिल्ला वर्षहरूमा धनकुटामा कृषि र साना उद्योग क्षेत्र दुवैमा प्रविधिको प्रयोगले ठूलो रूपान्तरण ल्याएको छ। पहिले हातको बलमा हुने खेती अहिले मेसिनको प्रयोगमा हुँदैछ। गाउँगाउँमा पुगेका टेम्पो र मिनीट्र्याक्टरहरूले बजारसम्म उत्पादन पुर्याउने चुनौती पनि घटाएका छन्।
बिज्ञापन
स्थानीय उद्यममा पनि प्रविधिको प्रयोगले दक्षता बढाएको छ। शक्ति डेरी उद्योगका सञ्चालक राजु घिमिरेका अनुसार, पहिले घ्यू, पनिर र छुर्पीको प्याकेजिङ हातले गर्नुपर्थ्यो, तर अहिले मेसिनबाट सजिलै सम्भव भएको छ। “कम जनशक्तिमा धेरै काम हुन थालेको छ,” घिमिरे भन्छन्।
ओम बिस्कुट उद्योगका सञ्चालक टीका कटुवालले पनि प्रविधिले उत्पादन प्रक्रियालाई सुरक्षित र सस्तो बनाएको बताए। “पहिले भट्टीमा बिस्कुट पकाउँदा बिग्रने डर रहन्थ्यो, अहिले मेसिन तापक्रम पुगेपछि आफैं बन्द हुन्छ,” उनले भने।
धनकुटा नगरपालिका र स्थानीय निकायहरूले पछिल्ला पाँच वर्षमा प्रविधिको पहुँच विस्तारमा उल्लेखनीय भूमिका खेलेका छन्। नगरपालिकाका अनुसार, हालसम्म ३२० मिनीटिलर, ५२ च्यापकटर, १३ कम्बाइन मिल र ११ प्रकारका उद्योग प्रविधि वितरण गरिएका छन्।
धनकुटा नगरपालिकाका प्रमुख चिन्तन तामाङका अनुसार, “प्रविधिको प्रयोगले किसान र उद्यमीको जीवनस्तरमा सुधार आएको छ। खेती–पाती र उत्पादन दुवै क्षेत्रमा दक्षता र आयवृद्धि देखिएको छ।” समग्रमा हेर्दा, धनकुटामा प्रविधिले परम्परागत श्रमप्रधान खेती र उद्यमलाई आधुनिक स्वरूपमा रूपान्तरण गर्दै स्थानीय विकासको गतिलाई तीव्र बनाएको देखिन्छ।
