ताजा
लोकप्रिय
बिज्ञापन
चेतन संघर्ष क्षेत्री, रोल्पा । बर्खा सुरु हुनासाथ रोल्पा जिल्ला थबाङ गाउँपालिका (साविक उवा गाविस) का स्थानीयको दैनिकी फेरि पनि कष्टकर बनेको छ। लगातारको वर्षातले बाटो बिग्रँदा सामान्य यात्रा, बिरामीलाई अस्पताल पुर्याउने वा खाद्यान्न भित्र्याउने कामसमेत जोखिमपूर्ण र कठिन बन्ने गरेको छ।
बिज्ञापन
अत्यधिक वर्षाका कारण सडक हिलाम्य हुने, कतिपय ठाउँमा बगाएरै लैजाने स्थिति सिर्जना हुने भएकाले यातायात सेवा प्रायः ठप्प हुन्छ। सडकको दुरावस्था र साधन अभावले स्थानीयले बिरामी वा भारी सामान बोकेरै लामो दुरी पैदल यात्रा गर्नुपर्ने बाध्यता छ। यस्तै, हालै थबाङकी ७३ वर्षीया राममाया रोका मगर दम र निमोनियाबाट पीडित भएपछि गाउँलेहरूलाई ठूलो समस्या भोग्नुपर्यो। उनलाई उपचारका लागि अस्पताल लैजान कुनै सवारीसाधन उपलब्ध नभएपछि स्थानीय युवाले पालैपालो बोकेर कठिन बाटो हुँदै अस्पताल पुर्याएका थिए।
बिज्ञापन
स्थानीयको भनाइमा यस्तो समस्या वर्षौंदेखि दोहोरिँदै आएको हो। तर अझैसम्म सडक स्तरोन्नति र स्वास्थ्य सेवा पहुँचको ठोस पहल हुन सकेको छैन। आधारभूत पूर्वाधार अभावले गाउँको जीवन झन् कष्टकर बनेको उनीहरूको गुनासो छ।
थबाङ क्षेत्र शिक्षा, स्वास्थ्य, सडक र पूर्वाधार विकासमा पछाडि परिरहेको भन्दै स्थानीयले तत्काल ध्यान दिन आग्रह गरेका छन्। उनीहरूको भनाइमा—“सडक सुधार नभएसम्म बर्खा लाग्दा हरेक वर्ष यस्तो पीडा भोग्नुपर्ने स्थिति कायमै रहनेछ।”
