बिज्ञापन

विश्व बैंक र अन्तर्राष्ट्रिय मुद्रा कोष (IMF) को वार्षिक बैठकमा सहभागी हुन अमेरिका पुगेका अर्थमन्त्री रामेश्वरप्रसाद खनालले अमेरिका चेम्बर अफ कमर्सले आयोजना गरेको ‘बिजनेस डायलग’ कार्यक्रमलाई सम्बोधन गरेका छन्।

बिज्ञापन

‘फ्रम द हिमालयज टु द हार्टल्याण्ड : अमेरिका–नेपाल साझेदारीको मजबुती’ शीर्षकमा आयोजित उक्त कार्यक्रमलाई सम्बोधन गर्दै मन्त्री खनालले नेपालको आर्थिक स्थिति, लगानी वातावरण, र अमेरिकी निजी क्षेत्रसँगको सहकार्यका सम्भावनाबारे विस्तृत चर्चा गरेका थिए।

कार्यक्रममा अमेरिकाका लागि नेपालका राजदूत लोकदर्शन रेग्मी, दूतावासका अधिकारीहरू, अमेरिकी व्यवसायी तथा यूएस चेम्बर अफ कमर्सका सदस्यहरूको उपस्थिति थियो। मन्त्री खनालले नेपालको आर्थिक सुधार, वैदेशिक लगानीको अवसर, जलविद्युत्, पर्यटन र सूचना प्रविधि क्षेत्रमा सम्भावनाबारे प्रकाश पारेका थिए।

बिज्ञापन

यसैबीच, मन्त्री खनालले सोमबार अन्तर्राष्ट्रिय मुद्रा कोष (IMF) का उपप्रबन्ध निर्देशक बो लिबसँग भेटवार्ता पनि गरेका छन्। उक्त भेटमा वित्तीय नीति, मौद्रिक स्थायित्व, वैदेशिक लगानी प्रवर्द्धन, र नेपालको आर्थिक पुनरुत्थानका उपायहरूबारे छलफल भएको वाशिङटनस्थित नेपाली दूतावासले जनाएको छ।

भेटमा नेपाल राष्ट्र बैंकका गभर्नर डा. विश्वनाथ पौडेल, दूतावासका प्रतिनिधिहरू, मन्त्री खनालको भ्रमण टोलीका सदस्य र कोषका उच्च अधिकारीहरू पनि उपस्थित थिए। अर्थमन्त्री खनाल आइतबार विश्व बैंक र IMF को वार्षिक बैठकमा भाग लिन वाशिङटन डीसी पुगेका हुन्। बैठकमा नेपालका आर्थिक नीतिहरू, विकास सहयोग, र दीर्घकालीन वित्तीय सहकार्यका विषयमा उच्चस्तरीय छलफल हुने कार्यक्रम छ।