ताजा
लोकप्रिय
बिज्ञापन
भोटेकोसी पावर कम्पनी प्रालि र आयोजना प्रभावित स्थानीय समुदायबीच लामो समयदेखि जारी विवाद अन्त्य भएको छ। कम्पनी र स्थानीयबीच सेयर स्वामित्वको विषयमा सहमति भएपछि आजदेखि आयोजनाको विद्युत् उत्पादन पुनः सुरु भएको हो।
बिज्ञापन
सहमति अनुसार कम्पनीले आयोजना प्रभावित स्थानीय जनतालाई आफ्ना कुल सेयरमध्ये १० प्रतिशत हिस्सा उपलब्ध गराउनेछ। यसअघि कम्पनीले ६ प्रतिशत सेयर दिने प्रस्ताव गरेको थियो, तर नयाँ सहमतिअनुसार चार प्रतिशत थप गरी कुल १० प्रतिशत सेयर वितरण गरिने भएको हो।
अंकित मूल्य १०० रुपैयाँ कायम गरी स्थानीयलाई उक्त सेयर निष्कासन गर्ने तयारी सुरु भएको कम्पनीले जनाएको छ। त्यस्तै, कम्पनीले सामाजिक उत्तरदायित्व (CSR) अन्तर्गत भोटेकोसी गाउँपालिकालाई रु. २ करोड ५० लाख रकम जम्मा गर्ने पनि सहमति भएको छ। उक्त रकम आयोजना प्रभावित स्थानीयको हितका लागि खर्च गरिने बताइएको छ।
बिज्ञापन
सहमति पत्रमा उल्लेख छ, “आयोजनाबाट प्रभावित स्थानीय बासिन्दाको सामाजिक उत्तरदायित्व सुनिश्चित गर्न कम्पनीले भोटेकोसी गाउँपालिकामा दुई करोड ५० लाख रुपैयाँ जम्मा गर्नेछ।”
यसबाहेक, कम्पनी र स्थानीय पक्षबीच भविष्यमा उत्पन्न हुन सक्ने समस्या समाधानका लागि सहकार्य गर्ने, आयोजना क्षेत्रका कर्मचारीहरूको सुरक्षा र शान्तिपूर्ण सञ्चालन सुनिश्चित गर्ने सहमति पनि भएको छ।
सहमति पश्चात्, स्थानीयले भदौ २५ गतेदेखि रोकेको आयोजनाको विद्युत् उत्पादन पुनः सञ्चालनमा आएको कम्पनीले जनाएको छ।
