हाल आफ्नो पेशागत यात्राको सफलता भोगिरहेकी क्यानेडियन डान्सर तथा बलिउड अभिनेत्री नोरा फतेही, ‘ओ मामा ! तेतेमा’ जस्ता गीतबाट चर्चित छन्। तर अब उनी अभिनयको दुनियाँमा नयाँ चुनौती लिन लागेकी छिन्। डर–कमेडी फ्रेन्चाइजको चौथो भाग ‘कन्चना ४’ बाट उनी तमिल सिनेमा क्षेत्रमा डेब्यु गर्न तयार छिन्।

बिज्ञापन

भारतीय मिडिया हिन्दुस्तान टाइम्ससँगको कुराकानीमा अभिनेत्री नोराले फिल्मको बारे बताउँदै भनिन्, ‘जब मलाई कञ्चना ४ को अफर आयो, मलाई तुरुन्तै लाग्यो कि यो तमिल सिनेमामा पाइला राख्नको लागि सही परियोजना हो। फ्रेन्चाइजले पहिले नै दर्शक माझ अपार लोकप्रियता बनाइसकेको थियो । स्क्रिप्ट यति रोचक र अनौठो थियो कि मैले तुरुन्तै यसको हिस्सा बन्न सहमति दिए ।’

बिज्ञापन

‘फिल्म ‘मडगाउँ एक्सप्रेस’ को सफलता पछि फेरि एउटा कमेडीमा काम गर्ने उत्साह थियो । ‘कन्चना ४’ त्यस अवसरका लागि उपयुक्त परियोजना जस्तो लाग्यो’, उनले थप भनिन् । अहिलेसम्म हिन्दी फिल्म ‘बि ह्यापी’ र ‘स्ट्रीट डान्सर थ्रीडि’ मा अभिनय गरिसकेकी नोरा फतेहीले मल्यालम र तेलुगु फिल्म उद्योगमा पनि काम गरेकी छिन्।

उनी भन्छिन्, ‘प्रत्येक फिल्म उद्योगको आफ्नै विशेषता छ। तमिल सिनेमा कथामा आधारित हुन्छ र प्रदर्शनमा जोड दिन्छ, बलिउड भने आफ्नो ठुलो ऊर्जा लिएर काम गर्छ। दुवै उद्योग चलचित्रप्रति उत्साही छन्, तर काम गर्ने शैली, दर्शकको अपेक्षा र निर्माण प्रक्रिया फरक छ। मेरो लागि दुवै दुनियाँबाट अनुभव लिनु रोमाञ्चक छ।’

बिज्ञापन

यसरी नोरा फतेहीले विभिन्न भाषाका फिल्म उद्योगमा काम गर्ने अनुभवसँगै तमिल सिनेमा प्रवेश गरेर आफ्नो पेशागत यात्रा अझै व्यापक बनाउन लागेकी छन्।