चालू आर्थिक वर्षको सात महिनामा ८ खर्ब ६१ अर्ब ३८ करोड रुपैयाँ व्यापार घाटा भएको छ ।
बिज्ञापन
भन्सार विभागका अनुसार साउनदेखि माघसम्ममा ९ खर्ब ८८ अर्ब ५८ करोड रुपैयाँबराबरको वस्तु आयात भएको छ । यस अवधिमा निर्यात १ खर्ब २७ अर्ब २० करोड रुपैयाँमा सीमित रहेको छ । गत आवको तुलनामा आयात १० शून्य दशमलव ९ प्रतिशत, निर्यात ४६ दशमलव ५० प्रतिशत र कूल वैदेशिक व्यापार १३ दशमलव ३० प्रतिशतले वृद्धि भएको विभागले जनाएको छ । गत वर्षको तुलनामा वैदेशिक व्यापार १ खर्ब ३१ अर्ब रुपैयाँले बढेको छ । अहिले पनि नेपालको सबैभन्दा ठूलो व्यापार घाटा भारतसँग रहेको छ । माघ मसान्तसम्म भारतबाट ५ खर्ब ९६ अर्ब ३५ करोड रुपैयाँबराबरको आयात भएको छ । निर्यात भने ९८ अर्ब ७५ करोड रुपैयाँको भएको छ । सात महिनामा भारतसँग ४ खर्ब ९८ अर्ब ३४ करोड रुपैयाँ घाटा बेहोरेको हो ।
बिज्ञापन
चीनसँगको मात्र व्यापार घाटा १ खर्ब ९० अर्ब ४४ करोड रुपैयाँ रहेको छ । सात महिनामा चीनबाट १ खर्ब ९२ अर्ब ४५ करोड रुपैयाँबराबरको आयात भएको तथ्यांक रहेको छ । निर्यात भने २ अर्ब रुपैयाँको भएको छ । भारत र चीनपछि व्यापार घाटा रहेका मुलुकहरूमा अर्जेन्टिना, युक्रेन, संयुक्त अरब इमिरेट्स, अस्ट्रेलिया रहेका छन् । नेपालले ३५ वटा मुलुकसँग भने व्यापार नाफा गरिरहेको छ । माघ मसान्तसम्म सबैभन्दा धेरै व्यापार नाफा अफगानिस्तानसँग देखिएको छ । अफगानिस्तानबाट १ करोड २४ लाख रुपैयाँबराबरको आयात भएको छ । यसैगरी, निर्यात भने ५९ करोड ४५ लाख रुपैयाँबराबरको भएको छ । डेनमार्क, रसिया, अस्ट्रिया, नर्वे, माल्दिभ्ससँग पनि व्यापार नाफा उच्च रहेको छ ।
चालू आवको माघ मसान्तसम्म नेपालले कुल ११ खर्ब १५ अर्ब ७९ करोड रुपैयाँबराबरको वैदेशिक व्यापार गरेको छ । नेपालको कुल वैदेशिक व्यापारमा आयातको हिस्सा ८८ दशमलव ६० प्रतिशत र निर्यातको हिस्सा ११ दशमलव ४० प्रतिशत रहेको छ । व्यापार घाटा गत वर्षको तुलनामा ६ दशमलव २० प्रतिशतले बढेको भन्सार विभागले जनाएको छ । भन्सार विभागका अनुसार सबैभन्दा धेरै पेट्रोलियम पदार्थको आयात भएको छ । सात महिनामा २९ अर्ब ४५ करोड रुपैयाँबराबरको डिजेल आयात भएको छ भने २४ अर्ब ५८ करोड रुपैयाँबराबरको पेट्रोल आयात भएको छ । यसैगरी, ६ अर्ब ६१ करोड रुपैयाँबराबरको एलपी ग्यास आयात भएको छ । त्यस्तै, ५ अर्ब ५० करोड रुपैयाँबराबरको विद्युतीय सवारीसाधन र ५ अर्ब ४३ करोड रुपैयाँबराबरका अन्य सवारीसाधन आयात भएका छन् ।
बिज्ञापन
माघ मसान्तसम्ममा ३२ अर्ब ४१ करोड रुपैयाँबराबरको सोयाबिन तेल निर्यात भएको छ । सूर्यमुखी तेलको बीउ तथा तेल निर्यात दोस्रो स्थानमा छ । सूर्यमुखी तेल ६ अर्ब ५७ करोड रुपैयाँबराबरको निर्यात भएको हो । यसैगरी, ६ अर्ब ४६ करोड रुपैयाँबराबरको अलैंची निर्यात भएको छ । ३ अर्ब ८९ करोड रुपैयाँबराबरको कार्पेट, ३ अर्ब १० करोड रुपैयाँबराबरको धागो र ३ अर्ब रुपैयाँबराबरको चिया निर्यात भएको छ । सात महिनामा करिब २ खर्ब रुपैयाँभन्दा बढीको कृषिजन्य वस्तु विदेशबाट आयात भएको भन्सार विभागको तथ्यांक रहेको छ ।
यस अवधिमा ६६ अर्ब २० करोड रुपैयाँबराबरको जनावर र वनस्पतिजन्य बोसो र तेल आयात भएको छ । ३६ अर्ब ३५ करोड रुपैयाँबराबरको खाद्यान्न आयात भएको छ । २५ अर्बको तरकारी, ५ अर्ब ४८ करोड रुपैयाँको आलु, २ अर्ब १३ करोडको प्याज, ६ अर्ब ८१ करोडको लसुन, ३ अर्ब ९७ करोडको दाल, १२ अर्ब ३२ करोडको फलफूल, १६ अर्ब ४२ करोडको कृषिजन्य औद्योगिक कच्चा पदार्थ, ५ अर्ब ४९ करोडको चिया तथा कफी, २ अर्ब ६१ करोड रुपैयाँको चिनी तथा चिनीजन्य कन्फेक्सनरी आयात भएको विभागले जनाएको छ ।
फलाम तथा स्टिलको आयातमा ८० अर्ब ६६ करोड रुपैयाँ बिदेसिएको छ । पशुजन्य तथा वनस्पति तेल र घिउ आयातमा ६६ अर्ब २० करोड रुपैयाँ बिदेसिएको तथ्यांक छ । विद्युतीय मेसिन तथा त्यसको पार्टपुर्जामा ६५ अर्ब ४० करोड रुपैयाँ बिदेसिएको छ । सवारीसाधन आयातमा ५५ अर्ब २१ करोड रुपैयाँ बिदेसिएको भन्सार विभागको तथ्यांक छ ।








