ताजा
लोकप्रिय
युरोपको सबैभन्दा ठूलो अर्थतन्त्र जर्मनीको सकल घरेलु उत्पाद (जीडीपी) सन् २०२५ को दोस्रो त्रैमासिकमा ०.३ प्रतिशतले घटेको सरकारी तथ्याङ्कले देखाएको छ। यो दर जुलाईमा सार्वजनिक प्रारम्भिक अनुमान (०.१%) भन्दा बढी हो, जसले जर्मन अर्थतन्त्रबारे थप चिन्ता बढाएको छ।
बिज्ञापन
जर्मन संघीय तथ्याङ्क संस्था (डेस्टाटिस) का अनुसार खपत, निर्माण र उत्पादन क्षेत्रमा अपेक्षाभन्दा कमजोर प्रदर्शन भयो। वस्तु निर्यात ०.६ प्रतिशतले र मेसिन तथा उपकरणमा लगानी १.९ प्रतिशतले घटेको छ।
बिज्ञापन
आईएनजी बैंकका विश्लेषक कास्र्टेन ब्रजेस्कीले अमेरिकी राष्ट्रपति डोनाल्ड ट्रम्पको भन्सार कर नीति र अमेरिकी डलरको तुलनामा युरोको मूल्यवृद्धिका कारण जर्मनीको निर्यात–केन्द्रित अर्थतन्त्रलाई चाँडै सुधार्न कठिन हुने बताए। उनले भने, “जर्मनी लामो समयदेखि आर्थिक स्थिरताको अवस्थामा छ र सन् २०२६ अघि उल्लेखनीय सुधारको सम्भावना कमजोर छ।”
जर्मनीले पछिल्ला वर्षहरूमा ऊर्जा मूल्य वृद्धि, उच्च उत्पादन लागत र चीनसँगको प्रतिस्पर्धाका कारण आर्थिक चुनौती भोगिरहेको छ। डेस्टाटिसका अनुसार २०२३ मा जर्मनीको जीडीपी ०.९ प्रतिशतले र २०२४ मा ०.५ प्रतिशतले घटेको थियो।
बिज्ञापन
यसैबीच अमेरिका–युरोपेली संघबीचको नयाँ व्यापारिक सहमतिको ढाँचा पनि जर्मनीका लागि प्रतिकूल देखिएको छ। यसअन्तर्गत जर्मन कार उत्पादकहरूले उच्च आयात शुल्कको सामना गर्नुपर्ने भएकाले वार्षिक अर्बौं युरो घाटा हुनसक्ने चेतावनी उद्योग महासंघले दिएको छ।
