ताजा
लोकप्रिय
बिज्ञापन
इजरायलमा हमासद्वारा बन्धक बनाई ज्यान गुमाएका कञ्चनपुरका युवा विपीन जोशीको शव आज (सोमबार) त्रिभुवन अन्तर्राष्ट्रिय विमानस्थलमार्फत काठमाडौं ल्याइएको छ। इजरायल सरकारले शव नेपालसम्म पठाएको हो।
बिज्ञापन
शवलाई श्रद्धाञ्जली दिन प्रधानमन्त्री सुशीला कार्कीसहित सरकारका मन्त्रीहरू विमानस्थल पुगेका थिए। प्रधानमन्त्री कार्कीले विपीनको शवमा नेपालको राष्ट्रिय झण्डा ओढाएर श्रद्धाञ्जली अर्पण गरिन्। उनका साथै ऊर्जा मन्त्री कुलमान घिसिङ, गृहमन्त्री ओमप्रकाश अर्याल, सञ्चार तथा सूचना प्रविधि मन्त्री जगदीश खरेललगायतले पनि श्रद्धाञ्जली दिएका थिए।
स्काई ट्रकमार्फत कञ्चनपुरतर्फ अन्तिम यात्रा
बिज्ञापन
श्रद्धाञ्जली कार्यक्रमपछि विपीनको शव नेपाली सेनाको जहाज (स्काई ट्रक) मार्फत धनगढी विमानस्थलसम्म लगिएको छ। त्यसपछि सुदूरपश्चिम पृतनाले शवलाई कञ्चनपुर पुर्याउनेछ। कञ्चनपुरमै उनको अन्तिम संस्कार गरिने जनाइएको छ।
हमास आक्रमणको पीडादायक क्षण
सन् २०२३ अक्टोबर ७ मा हमासले इजरायलमा आक्रमण गर्दा विपीनसहित २५१ जना बन्धक बनाइएका थिए। केही दिनअघि हमास र इजरायलबीच युद्धविराम भएपछि विपीनको मृत्यु भइसकेको घोषणा गरिएको थियो।
त्यसपछि हमासले रेडक्रसमार्फत शव इजरायली सेनालाई सुम्पिएको थियो। डीएनए परीक्षणबाट शव विपीनकै भएको पुष्टि भएपछि इजरायल सरकारले शव नेपाल पठाएको हो।
राष्ट्रिय पीडा र सम्मान
विपीन जोशीको निधनले सम्पूर्ण नेपाली समाजलाई स्तब्ध बनाएको छ। इजरायलमा काम गर्न गएका युवाहरूको सुरक्षाप्रति पुनः प्रश्न उठ्न थालेका छन्। यद्यपि, विपीनको शव राष्ट्रिय सम्मानका साथ स्वदेश ल्याई उनको बलिदानलाई स्मरणीय बनाइएको छ।
सरकारले विपीनप्रति श्रद्धाञ्जली अर्पण गर्दै उनको परिवारप्रति समवेदना प्रकट गरेको छ र यस्ता घटनाको पुनरावृत्ति रोक्न राज्य स्तरमा थप सक्रियता अपनाउने प्रतिबद्धता व्यक्त गरेको छ।
