ताजा
लोकप्रिय
प्रहरीले भैरहवामा २० किलो लागुऔषध चरेस बरामद गरेको छ। सिद्धार्थनगर नगरपालिका वडा नं. ८ लुम्बिनी रोडमा रहेको चन्द्रसूर्य होटलबाट उक्त चरेस बरामद गरिएको प्रहरीले जनाएको छ। शुक्रबार बिहान प्रहरी टोलीले होटलभित्र लुकाएर राखेको अवस्थामा चरेस बरामद गरेको थियो।
बिज्ञापन
बरामद गरिएको चरेसलाई आवश्यक कारबाहीका लागि जिल्ला प्रहरी कार्यालयमा राखिएको छ। लागुऔषध नियन्त्रण ब्यूरो शाखा कार्यालय भैरहवाका प्रमुख सागर भट्टराईले विशेष सुराकीको आधारमा २० किलो चरेससहित त्यसमा संलग्न चार जना कारोबारीलाई पक्राउ गरिएको बताए। उनीहरूको नाम र ठेगाना भने प्रहरीले सार्वजनिक गरेको छैन। पक्राउ गर्ने क्रममा एक जना कारोबारी भने फरार भएका छन्।
बिज्ञापन
जिल्ला प्रहरी कार्यालय रूपन्देहीका प्रमुख प्रहरी उपरीक्षक रंजित सिंह राठौरले पनि चार जनालाई पक्राउ गरिएको र फरार रहेकाको खोजी भइरहेको बताए। प्रहरीका अनुसार पक्राउ परेका चार जना युवक धादिङको गजुरीका हुन्। बरामद गरिएको चरेसको बजार मूल्य नेपालमा ९ लाख रुपैयाँभन्दा धेरै पर्छ।
नेपालमा भन्दा चरेसको मूल्य भारतमा अत्यधिक धेरै पर्ने गर्छ। भारतमा मूल्य धेरै पर्ने भएकोले धादिङको गजुरीबाट भैरहवा हुँदै भारततर्फ लैजाने क्रममा उक्त परिमाणको चरेस बरामद भएको हो। बुधबार होटलको एउटा कोठा उनीहरूले बुक गरेका थिए। होटलमा कोठा बुक गरिएको विवरणमा पुस्तिकामा काठमाडौं महानगरपालिका बालाजु बस्ने सुजन लामा र धादिङ गजुरी गाउँपालिका–८ का दिपक तामाङको नाम लेखिएको छ।
बिज्ञापन
पक्राउ गरिएका चारै जना युवा चरेसको कारोबारी भएको र यसबारेमा थप अनुसन्धान भइरहेको प्रहरीले जनाएको छ।
