ताजा
लोकप्रिय
खानेपानी मन्त्री प्रदीप यादवले मन्त्रालयमा भएको आगलागीबाट मन्त्रालयका अति आवश्यक एवम् महत्वपूर्ण कागजातमा कुनै क्षति नभएको बताएका छन्। आगलागी पश्चात तत्काल मन्त्रालय पुगेका मन्त्री यादवले सो कुरा बताएका हुन्।
बिज्ञापन
मन्त्री यादवसहित मन्त्रालयका सचिव ई.प्रमिलादेवी शाक्य बज्रचार्य, सहसचिव रमाकान्त दुवाडी सहितको टोलीले आगलागीले जलेको कार्यकक्षको निरीक्षण गरेका थिए। निरीक्षण पश्चात सञ्चारकर्मीहरुसँगको संक्षिप्त कुराकानीमा आगलागीबाट मन्त्रालयका अति आवश्यक एवम् महत्वपूर्ण कागजातमा भने कुनै क्षति नभएको मन्त्री यादवले बताए। उनले भने, ‘मैले मन्त्रालयका आवश्यक कागजात आफ्नो टेबलमा राख्दिनँ, सबै सही गरेर सचिव ज्युलाई पठाउने गर्छु । सामान्य केही पढ्नका लागि राखिएका कागजात बाहेक कुनै पनि महत्वपूर्ण कागजात नष्ट भएको छैन।’
बिज्ञापन
विद्युत् सर्ट भएकै कारण आगलागी भएको हुनसक्ने आशंका गर्दै मन्त्री यादवले भने, ‘दुःखद घटना भयो। घटनाबारे प्रहरीले अनुसन्धान गरिरहेको छ। हिजो शुक्रबार नै विद्युतको तार पोलिएको गन्ध आएको थियो। मैले कार्यालय सहयोगीलाई यसको जानकारी गराएको थिएँ। पानी तताउने मेसिन होला भनेर विद्युतका सबै प्लगहरू निकाल्न लगाएको थिएँ। आज भने आगलागी भयो।’
आज बिहान करिब ८ बजेर ४० मिनेटमा भएको उक्त आगलागीले खानेपानीमन्त्री यादवको कार्यकक्षमा पूर्ण रूपमा क्षति पुर्याएको छ। अचानक लागेको आगलागीले मन्त्री यादवको कार्यकक्षमा रहेका दुईवटा टेलिभिजन, एउटा कम्प्युटर, डेस्कटप, पानी तताउने मेसिन, टेबल, सोफा, कुर्सीहरू, कार्पेट, सीसी क्यामेराको मनिटर लगायतका सामग्रीमा क्षति भएको मन्त्रालयका सहसचिव रमाकान्त दुवाडीले जानकारी दिए।
बिज्ञापन
