ताजा
लोकप्रिय
देशभर डेंगी संक्रमण तीव्ररुपमा फैलिरहेको छ । इपिडिमियोलोजी तथा रोग नियन्त्रण महाशाखाको पछिल्लो तथ्यांक अनुसार डेंगी संक्रमितको संख्या १९ हजार ५ सय ९९ पुगेको छ । डेंगी संक्रमणबाट हालसम्म नौ जनाले ज्यान गुमाइसकेका छन् ।
बिज्ञापन
डेंगी संक्रमण मुलुकका ७६ जिल्लासम्म फैलिएको महाशाखाले जनाएको छ । डेंगी संक्रमण सबैभन्दा बढी काठमाडौंमा फैलिएको छ । काठमाडौंमा हालसम्म तीन हजार एक सय तीन जना डेंगी संक्रमण भएको छ । यस्तै, कास्कीमा दुई हजार आठ सय ४७ जनामा डेंगी संक्रमण देखिएको छ । तनहुँमा २ हजार १०७, पर्वतमा १ हजार ५६२, चितवनमा ९७१, ललितपुरमा ८२७, गोरखामा ५८८, बाग्लुङमा ६१०, भक्तपुरमा ३५५ र स्याङ्जामा ३३५ जनामा डेंगी संक्रमण पुष्टि भइसकेको महाशाखाले जनाएको छ ।
बिज्ञापन
शुक्रराज ट्रपिकल तथा सरुवा रोग अस्पताल टेकुका रिसर्च युनिटका संयोजक तथा संक्रामक रोग विशेषज्ञ डा. शेरबहादुर पुनका अनुसार पोस्ट मनसुन सुरु हुँदा डेंगीको जोखिम बढ्ने सम्भावना हुन्छ । ‘दसैँलगत्तै अस्पताल आउने डेंगीका बिरामी बढिरहेका छन् । समुदायमा डेंगी संक्रमण फैलिएको देखिन्छ,’ उनले भने ।
२०८० को पुस मसान्तसम्म देशभर झण्डै ५२ हजारभन्दा बढीमा डेंगी संक्रमण पुष्टि भएकोमा २० जनाको मृत्यु भएको थियो । डेंगी एडिस एजिप्टाई जातको पोथी लामखुट्टेको टोकाइबाट सर्ने एक प्रकारको कीटजन्य रोग हो । लामखुट्टेको टोकाइबाट बच्न पूरा शरीर ढाक्ने कपडा लगाउने, खाल्डाखुल्डी पुर्ने, खानेपानी वा ढल चुहिएको छ भने तत्काल मर्मत गर्ने, खाली भाँडाकुँडा घोप्ट्याएर राख्ने, पानीको ट्याङ्की पूरै खाली गरेर सफा गरिरहने र सुत्ने बेला झुलको प्रयोग गर्नुपर्छ ।
बिज्ञापन
