बिज्ञापन

अमेरिकी राष्ट्रपति डोनाल्ड ट्रम्पको नेतृत्व र नीतिको विरोधमा अमेरिका भरि ‘नो किङ्स’ (राजा चाहिँदैन) भन्ने नारासहित व्यापक प्रदर्शनहरू भएका छन्। पूर्वराष्ट्रपति ट्रम्पको ह्वाइट हाउस फर्किएपछि भएको यो तेस्रो ठूलो प्रदर्शन हो।

बिज्ञापन

अलजजिराले जनाएअनुसार, देशभर २६०० भन्दा बढी स्थानमा विरोध कार्यक्रम आयोजना हुने अपेक्षा गरिएको छ। आन्दोलनका आयोजकहरूले ट्रम्पको शिक्षा नीति, मानव अधिकारमाथिको रवैया र सुरक्षा उपायहरूलाई अलोकतान्त्रिक भन्दै चर्को आलोचना गरेका छन्।

प्रदर्शनकारीहरू ‘विरोध गर्नु नै ठूलो देशभक्ति हो’, ‘फाँसीवादको प्रतिरोध गर’ लगायतका नारा लेखिएको प्लेकार्ड बोकेर न्युयोर्कको टाइम्स स्क्वायर, बोस्टन कमन, शिकागोको ग्रान्ट पार्क लगायत सयौं सार्वजनिक स्थलमा भेला भए। सडकहरू उत्सवमय देखिएका थिए, तर सन्देश गम्भीर थियो।

बिज्ञापन

‘सटडाउन’को पृष्ठभूमिमा बढ्दो असन्तुष्टि

हालैको संघीय सरकारको ‘सटडाउन’ (सरकारी कामकाज स्थगन) ले सेवामा असर मात्र पारेको छैन, संसद् र अदालतजस्ता संस्थाहरूको संवैधानिक स्वतन्त्रता पनि संकटमा पारेको प्रदर्शनकारीहरूको भनाइ छ। उनीहरू ट्रम्प नेतृत्वको शक्ति केन्द्रीकरण प्रवृत्तिलाई “राजतन्त्र”सँग तुलना गर्दै विरोधमा उत्रिएका हुन्।

अन्तर्राष्ट्रिय ऐक्यबद्धता

यस आन्दोलनको प्रतिध्वनि केवल अमेरिका सीमित रहेन। लन्डनस्थित अमेरिकी दूतावासअगाडि २०० भन्दा बढी प्रदर्शनकारी, साथै म्याड्रिड र बार्सिलोनामा पनि सयौं सहभागी भएका छन्। यस्ता प्रदर्शनहरूबाट ट्रम्पविरुद्धको अन्तर्राष्ट्रिय असन्तुष्टि समेत झल्किएको छ।

ट्रम्पको प्रतिक्रिया: “म राजा होइन”

प्रदर्शनकै बीच ट्रम्पले फक्स न्युजसँगको अन्तर्वार्तामा प्रतिक्रिया दिँदै भने, “उनीहरूले मलाई राजा भन्दै छन्, तर म राजा होइन।”

हाल उनी फ्लोरिडाको मार-ए-लागो निवासमा बस्दै आएका छन्।

‘नो किङ्स’ आन्दोलनले अमेरिकामा शक्ति सन्तुलन, लोकतान्त्रिक मूल्य, र नागरिक अधिकारको पक्षमा जनमत परिचालित गरिरहेको छ। ट्रम्प प्रशासनमाथिको जनआक्रोश र असन्तुष्टि राजनीतिक बहसको केन्द्रमा पुगेको छ। सटडाउनको प्रभाव र ट्रम्पको नीतिगत कठोरता आगामी चुनावी समीकरणमा समेत गहिरो असर पार्न सक्छ।