ताजा
लोकप्रिय
अविरल वर्षाको कारण काभ्रेको रोशीखोला क्षेत्रमा अलपत्र परेका बिरामी र यात्रुलाई सशस्त्र प्रहरीले उद्धार गरेको छ । सिन्धुलीको नेपालथोकदेखि काभ्रेको भकुण्डेवेशीसम्म १० भन्दा धेरे ठाउँको सड्क रोशीले कटान गरेको छ ।
बिज्ञापन
पूर्व क्षेत्र र तराईबाट आएर काभ्रेको रोशी गाउँपालिका वडा नम्बर–९ दाउन्ने, वडा नम्बर ८ पिन्थली र नमोबुद्ध नगरपालिका–६ स्थित चौकीडाँडामा अलपत्र परेका यात्रुको सशस्त्रले उद्धार गरेको हो । जनकपुरबाट एम्बुलेन्समा आएका र दाउन्नेमा ३ दिनदेखि अलपत्र स्पाइनल इन्जुरीको बिरामी लाई सशस्त्रले बाँसको खट बनाएर उद्धार गरेको छ । स्पाइनल इन्जुरीको समस्या भएका ६५ वर्षीय रामचन्द्र यादव लाई बाँसको खट बनाएर करिब १५ किलोमिटर बोकेर सेनाको हेलिकप्टरसम्म लगिएको सशस्त्र प्रहरी बल प्रधान कार्यालयले जनाएको छ ।
बिज्ञापन
सशस्त्र प्रहरी बलका एसपी प्रेम प्रसाईं नेतृत्वको टिमले बाटोमा अलपत्र मधुमेहको समस्या भएका ६९ वर्षीय शम्भु चौधरी, ५९ वर्षीया रितादेवी चौधरी, टाइफाईड भएका ३० वर्षीय कुमार तामाङ र बिरामी लिएर काठमाडौँ आउँदै गरेका ६५ वर्षीय जोगेन्द्र यादवलाई उद्धार गरेको छ । उनीहरू जनकपुरबाट उपचारको लागी काठमाडौँ आउँदै थिए । रोशी गाउँपालिका वडा नम्बर–८ स्थित पिन्थलीमा अलपत्र वृद्ध, अशक्त र बिरामी परेका १३ जनालाई सशस्त्रले बोकेर सुरक्षित तरिकाले सड्क पार गराएको छ ।
रोशी गाउँपालिका वडा नम्बर–९ स्थित नार्के बजारको १३ वटा पक्की घर रोशी खोलाले बगाएको छ । घर बगाएपछि विस्थापीत भएकाहरुलाई सशस्त्रले दुईवटा जस्ताको टहरा निर्माण गरेको छ । वडा नम्बर–८ मा १३ घर परिवारका लागी टहर निर्माण गरिएको सशस्त्र प्रहरीले जनाएको छ । रोशीखोला, दाउन्ने र भ्याकुरे खोलाको कारण बाटो पार गर्न नसकेर अलपत्र यात्रुलाई सहजिकरण गर्न सशस्त्रले सो क्षेत्रका ५ ठाउँमा गोरेटोबाटो र अस्थायी पुल निर्माण गरेको छ । जोखिममा रहेका घरको सामानहरु सार्न पनि सशस्त्रले स्थानीयलाई सहयोग गरेको छ ।
बिज्ञापन
नमोबुद्ध नगरपालिका–६ स्थित चौकिडाँडामा ३ दिनको सुत्केरी महिला र नवजात बच्चालाई खोला तारेर सशस्त्रका सकलदर्जाले ४ किलोमिटर पार गराएको सशस्त्र प्रहरी बल प्रधान कार्यालयले जनाएको छ । रोशीखोला क्षेत्रमा उद्धार गर्न सशस्त्र प्रहरी उपरीक्षक प्रेम प्रसाईँको नेतृत्वमा ६० जना उद्धारकर्मी खटिएका छन् । असोज १४ मा अलपत्र ९ जना भारतीयलाई सशस्त्रले कटुन्जेमा फेला पारेर आर्मीको हेलिकप्टरमार्फत धुलिखेल पठाएको थियो । चौकीडाँडा स्थित भीरमा अलपत्र ७५ जना यात्रुलाई सशस्त्रले सहायता दिएर भिर कटाएको छ ।
