ताजा
लोकप्रिय
विशेष अदालतले सर्लाहीको बागमती नगरपालिकाका निलम्बित मेयर भरत थापा दुई फरक भ्रष्टाचार मुद्दामा दोषी ठहर गरेको छ ।
बिज्ञापन
विशेष अदालतका अध्यक्ष टेकनारायण कुँवर र सदस्यहरु मुरारीबाबु श्रेष्ठ तथा विदुर कोइरालाको इजलासले बुधबार भरत ताल बनाउँदा सरकारी सम्पत्ति हानीनोक्सानी गरेको आरोपमा दोषी ठहर गरेको हो । यस्तै, विशेषले उनलाई गैरकानूनी सम्पत्ति आर्जन गरेको भ्रष्टाचार आरोपमा पनि दोषी ठहर गरेको छ ।
बिज्ञापन
बुधबार राति विशेष अदालतले सार्वजनिक गरेको आदेशअनुसार, भरतताल भ्रष्टाचारमुद्दामा मेयर थापासहित विमलकुमार पोखरेल र सागर पौडेल पनि दोषी ठहर भएका छन् । विशेष अदालतले उनीहरुमाथि ३० करोड २९ लाख रुपैयाँ नदीजन्य पदार्थ हानीनोक्सानी गरेको ठहर गरेको हो । उनीहरुलाई दोषी ठहर गर्दै सजाय निर्धारणका लागि विशेष अदालतले अर्को बिहीबार पेशी तोकेको छ । तीन वर्षभन्दा बढी सजाय हुने मुद्दामा सजाय निर्धारणका लागि छुट्टै सुनुवाइ गर्नुपर्ने व्यवस्था छ ।
विशेष अदालतले सोही भ्रष्टाचारमा मुछिएका अन्य आरोपितलाई भने सफाई दिएको छ । लिलाकुमारी मोक्तान, विश्वराज पोखरेल र मेथुर चौधरीले आरोपबाट सफाइ पाएका छन् । विशेष अदालतले मेयर थापाले ३ करोड ४५ लाख रुपैयाँ गैरकानूनी सम्पती आर्जन गरेकोमा दोषी ठह¥याएको हो । ९ करोड १४ लाख रुपैयाँ वैधरुपमा कमाएका उनले १२ करोड ५९ लाख रुपैयाँको सम्पत्ति जोडेको भेटिएको विशेष अदालतको ठहर छ । अख्तियारले ५ करोड ३३ लाख रुपैयाँ अवैधानिक तरिकाले कमाएको दाबी गरेको थियो ।
बिज्ञापन
थापालाई विशेष अदालतले गैरकानूनी सम्पत्तिआर्जनको भ्रष्टाचार मुद्दामा एक वर्ष कैद, विगो र त्यही बराबरको जरिवाना तिर्नुपर्ने फैसला गरेको छ । विशेष अदालतले उनले ३ करोड ४५ लाख बिगो बुझाउनुपर्ने ठहर गरेको हो । भ्रष्टाचार मुद्दा लागेपछि मेयर थापा २७ चैत, २०८० देखि निलम्बनमा छन् ।
