सधै दुर्घटनाको जोखिम रहेको पाल्पाको शिद्धबाबा क्षेत्रमा शनिवार ठूलो चट्टानसहितको पहिरो झर्यो । चर्को घाम लागिरहेको बेला नियमित रूपमा गाडी आवतजावत गरिरहेका थिए । दिउँसो साढे ३ बजेतिर एक्कासी ठूलो ढुंगासहितको पहिरो खस्न पुग्यो ।

बिज्ञापन

सो पहिरोमा पर्नबाट एउटा ३० जना सवार यात्रुबाहक बस जोगिएको छ । पर्वतको रानीपानीबाट बुटवलतर्फ आउँदै गरेको ना ५ ख ९८५१ नम्बरको ‘पर्वत एक्सप्रेस’ नामको गाडी मात्र दुई–चार सेकेन्डले दुर्घटनाबाट बचेको हो । आफू र आफ्ना यात्रु दुई–चार सेकेन्डले पहिरोमा पुरिनबाट बचेको चालक कमल क्षेत्रीले बताए ।

बिज्ञापन

‘गाडी गुडिरहेको अवस्थामा माथिबाट ढुंगा खस्यो,’ उनले भने, ‘माथिबाट पहिरो झरेपछि गाडी तत्काल ब्याक गरेँ । धन्न दुई–चार सेकेन्डले बचियो । छाँगाबाट खसेजस्तो भएँ । मेरो अगाडि पनि दुईजना बाइकमा सवार थिए उनीहरू पनि ठूलो कालबाट बचे ।’ त्यसपछि गाडी केही ब्याक गरेर पहिरो हेर्न गएको चालक क्षेत्रले जानकारी दिए । उनका अनुसार पहिरो झरेको ठाउँभन्दा झण्डै ५ मिटर अगाडिसम्म गाडी पुगेको थियो । गाडीमा ३० जना यात्रु थिए ।

बिज्ञापन

पहिरोले पुरिएको सडक शनिवार साँझ ७ बजेसम्म पनि खुलेको छैन । सोही क्षेत्रमा अहिले सुरूङमार्ग निर्माणको काम चलिरहेको छ । हिउँद होस् वा वर्खा शिद्धबाबा क्षेत्रमा पहिरो झरिरहन्छ । जसले गर्दा यात्रु र चालक त्रासमा यात्रा गर्न बाध्य छन् । पाल्पाको दोभान प्रहरी चौकीका प्रहरी नायव निरीक्षक जनक बुढाले पहिरो हटाउने कार्य जारी रहेको बताए । सिद्धबाबाको साढे ३ किलोमिटर क्षेत्रलाई जोखिमपूर्ण क्षेत्र मानिन्छ । पहिरोका कारण यो बाटो भएर स्याङजा, पोखरा, बाग्लुङ, गुल्मी र अर्घाखाँचीसम्म जाने सवारीसाधन र पहाडबाट बुटवलतर्फ आउने सयौँ सवारी बाटोमै रोकिएका छन् ।