सडक डिभिजन कार्यालय काठमाडौँले वर्षाको कारण सडक हिलो भएको विषयलाई सडक विभागकै प्रतिष्ठासँग जोडी अतिरञ्जित गरेको भन्दै असन्तुष्टि जनाएको छ । सडक विभाग परिसर हुँदै जाने सडकका बारेमा तस्बिर नै राखी सामाजिक सञ्जालमा आएका प्रतिक्रियाप्रति कार्यालयले असन्तुष्टि जनाएको हो ।

बिज्ञापन

आइतबारको वर्षाका कारण विभागको कार्यालय परिसर भित्रैको सडक हिलाम्मे भएको तस्बिर सामाजिक सञ्जालमा भाइरल भएपछि असन्तुष्टि जनाउँदै कार्यालयले वास्तविकता नबुझी स्वघोषित विज्ञ नबन्न चेतावनी दिएको छ । ‘विगत २४ घण्टामा सडक विभाग परिसर हुँदै जाने सडकका बारेमा तस्बिर नै राखी सामाजिक सञ्जालमा आएका अतिरञ्जित प्रतिक्रिया बारे सडक डिभिजन काठमाडौँको गम्भीर ध्यानाकर्षण भएको छ’, कार्यालयले सोमबार जारी गरेको विज्ञप्तिमा भनिएको छ, ‘सो सडकको निर्माणलाई प्राथमिकतामा राखिएको र निर्माण व्यवसायी पनि समय अगावै निर्माण सम्पन्न गर्ने गरी काम सुरु गरिरहेको सन्दर्भमा निर्माणाधीन सडकमा आएको समस्यालाई लिएर वास्तविकता नबुझी तथा यस किसिमका स्वाभाविक समस्यालाई बुझी बुझी पनि बुझ पचाउने, आफूलाई पूर्वाधार विज्ञ सम्झिने, स्वघोषित विज्ञहरूले भाइरल हुनका निम्ति यस किसिमको हर्कत गर्नु अझ दुर्भाग्य हो ।’

बिज्ञापन

उक्त सडक यसै आ।व। मा सम्पन्न हुने गरी २०८०-१०-१८ गते सम्झौता भइसकेको कार्यालयले जनाएको छ । डिभिजनसँग सडक विभागको परिसरमा स्तरोन्नति गर्ने कामका निमित्त सम्झौता गरेको निर्माण व्यवसायीले २०८०-११-१९ गते शनिवार सवग्रेडको तयारी गरेको भोलिपल्ट आएको वर्षाको कारण सडक हिलो भएको विषयलाई सडक विभागकै प्रतिष्ठासँग जोडी अतिरञ्जित गर्नु खेदजनक भएको विज्ञप्तिमा उल्लेख छ ।

बिज्ञापन

‘सडक विभाग, सडक डिभिजन काठमाडौँ मातहतका सडकहरूमा खाल्डा रहित बनाउने अभियानमा जुटेको संस्थालाई यस किसिमको हर्कत भनेको मनोबल गिराउने, समाजमा नकारात्मक सन्देश फैलाई देशमा केही राम्रो काम हुँदैन, सबैतिर यस्तै हो भन्ने खालका टिप्पणीले विद्यार्थीदेखि सबैमा नकारात्मक मनोभाव उत्पन्न भई विदेशिने कारण मध्ये यस्तै हर्कत पनि मुख्य रूपमा आएको छ,’ विज्ञप्तिमा भनिएको छ ।