बिज्ञापन

नेपाल राष्ट्र बैंकले सेयर धितो कर्जासम्बन्धी महत्वपूर्ण निर्णय लिँदै एकल ग्राहक कर्जा सीमालाई हटाएको छ। बुधबार जारी गरिएको ‘एकीकृत निर्देशन, २०८१’ संशोधनमार्फत राष्ट्र बैंकले पूर्ववत् २५ करोड रुपैयाँको सीमा हटाएको हो।

बिज्ञापन

यसअघि सेयर धितो अर्थात् मार्जिन प्रकृतिको कर्जामा अधिकतम एकल ग्राहक कर्जा सीमा २५ करोड रुपैयाँ तोकिएको थियो। अब, यो सीमा नहुनाले बैंक तथा वित्तीय संस्थाले जोखिम मूल्याङ्कनको आधारमा कर्जा प्रवाह गर्न सक्नेछन्।

पुँजी बजारको सुधारका लागि गठित कार्यदलले पनि सो सीमा हटाउन सुझाव दिएको थियो। त्यस्तै, सेयर लगानीकर्ताहरूले लामो समयदेखि यो सीमा हटाउन दबाब दिँदै आएका थिए। विश्लेषकहरूका अनुसार, राष्ट्र बैंकको यस कदमले पुँजी बजारमा तरलता प्रवाह बढाउने, लगानीकर्ताको पहुँच सजिलो बनाउने र समग्र सेयर बजारमा सकारात्मक प्रभाव पार्ने अपेक्षा गरिएको छ।

बिज्ञापन

बैंक वित्तीय संस्थालाई सेयर तथा डिबेञ्चर खरिदमा लचकता

नेपाल राष्ट्र बैंकले संगठित संस्थाको सेयर, डिबेञ्चर तथा अन्य लगानीमा खुकुलो नीति लिएको छ । राष्ट्र बैंकले एकीकृत निर्देशन, २०८१ मा संशोधन गरी प्राथमिक पुँजीको २० प्रतिशत रकमसम्मको लगानी मात्र बिक्री गर्न पाउने व्यवस्था खारेज गरेको छ । यसअघि खरिद गरेको एक वर्ष व्यतित भएका लगानीमध्येबाट एक आर्थिक वर्षमा प्राथमिक पुँजीको २० प्रतिशत रकमसम्मको लगानी मात्र बिक्री गर्न पाउने व्यवस्था थियो ।

सर्वसाधारणमा सेयर बिक्री गरी धितोपत्र विनिमय बजारमा सूचीकृत भइसकेको संगठित संस्थाको सेयर तथा डिबेञ्चरमा ६ महिनाभन्दा बढी अवधिको लागि मात्र लगानी गर्न पाउने व्यवस्था गरिएको छ । यसअघि संगठित संस्थाको सेयर तथा डिबेञ्चरमा एक वर्षभन्दा बढी अवधिको लागि मात्र लगानी गर्न पाइने व्यवस्था थियो । त्यसैगरी मार्जिन प्रकृतिको कर्जाको अधिकतम २५ करोड एकल ग्राहक कर्जा सीमा पनि हटाइएको थियो ।