बिज्ञापन

नेपाल नागरिक उड्डयन प्राधिकरणले आगामी दशैं, तिहार र छठ पर्वलाई लक्षित गर्दै आन्तरिक उडानका लागि अधिकतम हवाई भाडादर सार्वजनिक गरेको छ। दसैंको टीकाको दिन (असोज १६) लाई आधार मानेर निर्धारण गरिएको भाडादरमा यात्रुहरूबाट तोकिएको भन्दा बढी शुल्क असुल्न नपाइने प्रष्ट पारिएको छ।

बिज्ञापन

प्राधिकरणले अत्यधिक यात्रुको चाप हुने चाडपर्वको समयमा हवाई टिकटको कृत्रिम अभाव र महँगो मूल्यका गुनासो बढ्ने गरेको जनाउँदै यसपटक भाडादरमा पारदर्शिता ल्याउन सूची सार्वजनिक गरेको हो। नेपाल सरकारबाट स्वीकृत दरभन्दा बढी शुल्क लिएको पाइएमा वायु सेवा प्रदायक कम्पनीहरूविरुद्ध कडा कारबाही गरिने चेतावनीसमेत प्राधिकरणले दिएको छ।

सबैभन्दा धेरै भाडा काठमाडौं–धनगढी रुटमा

बिज्ञापन

प्राधिकरणले सार्वजनिक गरेको सूचीअनुसार सबैभन्दा धेरै भाडा काठमाडौं–धनगढी मार्गमा तोकिएको छ, जुन १७ हजार ५७९ रुपैयाँ रहेको छ। त्यसपछि काठमाडौं–नेपालगञ्ज (१३ हजार १०३), काठमाडौं–भद्रपुर (१२ हजार ११२) र काठमाडौं–विराटनगर (९ हजार ७८५) रहेका छन्।

सबैभन्दा सस्तो काठमाडौं–सिमरा उडान

अन्तरमा, सबैभन्दा कम भाडा काठमाडौं–सिमरा मार्गमा ३ हजार ९७८ रुपैयाँ निर्धारण गरिएको छ। काठमाडौं–भरतपुर (४ हजार ६४३) र काठमाडौं–जनकपुर (५ हजार ४७०) पनि तुलनात्मक रूपमा सस्ता मार्गमा पर्छन्।

प्राधिकरणका अनुसार, यस सूचीले यात्रुहरूलाई हवाई भाडा सम्बन्धी जानकारी स्पष्ट रूपमा उपलब्ध गराउनेछ र टिकट खरिद गर्दा अनावश्यक ठगी वा अनियमितताबाट जोगाउनेछ।

भाडादर उल्लंघनमा कारबाहीको चेतावनी

नेपाल नागरिक उड्डयन प्राधिकरणले वायु सेवा प्रदायक कम्पनीहरूलाई तोकिएको दरभन्दा बढी रकम असुल्न नपाइने स्पष्ट निर्देशन दिएको छ। यदि तोकिएको भाडादरभन्दा बढी रकम असुलिएको पाइएमा कानुनी कारबाही गरिने प्राधिकरणको चेतावनी छ। यात्रुहरूलाई पनि टिकट खरिद गर्दा अधिकतम भाडादरबारे जानकारी लिएर मात्र कारोबार गर्न सुझाव दिइएको छ।