अष्ट्रेलियाको न्यू साउथ वेल्समा लगातारको अविरल वर्षापछि आएको बाढीले राज्यको पूर्वी क्षेत्रमा रहेका १० हजारभन्दा बढी घरधुरी र सम्पत्तिमा क्षति पुगेको प्रारम्भिक अनुमान गरिएको छ ।

राज्य आपत्कालीन सेवाका प्रमुख सुपरिन्टेन्डेन्ट पल म्याकक्विले शनिवार बिहान पत्रकारहरूसँग कुरा गर्दै भने, “क्षतिको पूर्ण मूल्याङ्कनका लागि हाम्रा टोलीहरू सक्रिय रूपमा खटिरहेका छन्। यो अवस्था अझै जोखिमपूर्ण छ, त्यसैले सबैलाई उच्च सतर्कता अपनाउन अनुरोध गर्छु ।” उनले थपे, “पानीको स्तर पूर्ण रूपमा घट्ने र स्थानीयवासीले सुरक्षित रूपमा आफ्ना घर फर्कने अवस्था नबनेसम्म कसैलाई पनि घर फर्कन अनुमति दिइने छैन ।”

यसैबीच, न्यू साउथ वेल्स प्रहरीका अनुसार बाढी प्रभावित मिड नर्थ कोस्ट क्षेत्रमा जलेको सवारी साधनभित्र एक व्यक्तिको शव फेला परेको छ । यो घटनाले विगत पाँच दिनदेखिको वर्षा र बाढीका कारण ज्यान गुमाउनेको संख्या ५ पुगेको पुष्टि भएको छ ।

 बाढीले मिड नर्थ कोस्ट र हन्टर क्षेत्रमा ठूलो प्रभाव पारेको छ । टारी, केम्पसी, र पोर्ट म्याक्वारी जस्ता क्षेत्रमा सयौँ मानिसको उद्धार गरिएको छ भने करिब ५० हजार मानिस अझै अलग्गिएको अवस्थामा छन् । ब्यूरो अफ मेटियोरोलोजीले थप वर्षाको चेतावनी दिएको छ, जसले स्थिति अझ जटिल बनाउन सक्छ ।

प्रधानमन्त्री एन्थनी अल्बानेसले बाढी प्रभावित क्षेत्रको भ्रमण गर्ने योजना बनाएका थिए, तर बाढीका कारण टारी पुग्ने उनको भ्रमण रद्द भएको छ । उनले प्रभावित समुदायप्रति समवेदना व्यक्त गर्दै आपत्कालीन सेवालाई धन्यवाद दिएका छन् ।