अन्तर्राष्ट्रिय मुद्रा कोष (आईएमएफ) ले चालू आर्थिक वर्षका लागि भारतको आर्थिक वृद्धि प्रक्षेपण ०.२ प्रतिशतले वृद्धि गर्दै भारतलाई विश्वकै सबैभन्दा छिटो बढ्दो अर्थतन्त्रको रूपमा औँल्याएको छ।

बिज्ञापन

आईएमएफको विश्व आर्थिक दृष्टिकोण वृद्धि प्रक्षेपण प्रतिवेदनअनुसार, आर्थिक वर्ष २०२५–२६ मा भारतको वृद्धि दर ६.६ प्रतिशत पुग्ने अनुमान गरिएको छ। उच्च अमेरिकी भन्सार दरहरूको बाबजुद भारतले यो उपलब्धि हासिल गर्ने प्रक्षेपण गरिएको हो।

बिज्ञापन

अमेरिकाले भारतबाट आयात हुने केही वस्तुहरूमा ५० प्रतिशतसम्म भन्सार शुल्क लगाएको छ। जुन ब्राजिल बाहेक विश्वमै सबैभन्दा उच्च हो। यद्यपि, भारतको आन्तरिक खपत, लगानी र सरकारी नीतिहरूको सकारात्मक प्रभावले आर्थिक वृद्धि उच्च रहने प्रतिवेदनमा उल्लेख गरिएको छ।

चालू आर्थिक वर्षको पहिलो त्रैमासिकमा भारतको वृद्धि दर ७.८ प्रतिशत रहेको थियो। प्रतिवेदनमा अन्य प्रमुख अर्थतन्त्रहरूको अवस्थाबारे पनि प्रकाश पारिएको छ। चीनको वृद्धि दर ०.२ प्रतिशतले घट्दै ४.८ प्रतिशत मा झर्ने अनुमान गरिएको छ।

बिज्ञापन

संयुक्त राज्य अमेरिकाको वृद्धि दर अघिल्लो वर्षको तुलनामा ०.८ प्रतिशतले घट्दै २.० प्रतिशत रहने प्रक्षेपण गरिएको छ। आईएमएफको प्रतिवेदनले भारतको स्थायीत्वपूर्ण आर्थिक नीति, पूर्वाधारमा लगानी, र उपभोग वृद्धि नै उच्च आर्थिक वृद्धिको मुख्य आधार रहेको उल्लेख गरेको छ।