वाणिज्य बैंकहरूले चालु आर्थिक वर्षको तेस्रो त्रैमाससम्ममा १ खर्ब रुपैयाँभन्दा बढी सेयर धितो कर्जा (शेयर लोन) प्रवाह गरेका छन्।

बिज्ञापन

नेपाल राष्ट्र बैंकले सार्वजनिक गरेको तथ्यांकअनुसार हाल सञ्चालनमा रहेका २० मध्ये १९ वाणिज्य बैंकबाट उक्त अवधिसम्म कुल १ खर्ब १ अर्ब ६० करोड ७० लाख रुपैयाँ बराबरको सेयर लोन प्रवाह भएको हो। अघिल्लो आर्थिक वर्षको यही अवधिमा यो आँकडा ६७ अर्ब ५२ करोड ४९ लाख रुपैयाँ थियो। यस वर्ष सेयर लोनको माग अघिल्लो वर्षको तुलनामा ५०.४७ प्रतिशतले वृद्धि भएको देखिन्छ।

बिज्ञापन

सेयर बजारमा लगानीकर्ताको चासो बढेसँगै सेयर धितो कर्जाको माग पनि उल्लेख्य रूपमा बढेको छ। १७ वटा वाणिज्य बैंकहरूले अघिल्लो वर्षको तुलनामा यस वर्ष शेयर लोन प्रवाह बढाएका छन् । २ वटाको प्रवाह घटेको छ। स्ट्यान्डर्ड चार्टर्ड बैंकले भने सेयर धितो कर्जा प्रवाह गरेको छैन।

यो अवधिमा सबैभन्दा धेरै शेयर लोन प्रवाह गर्ने वाणिज्य बैंकमा नबिल बैंक रहेको छ। बैंकले यो अवधिसम्म १४ अर्ब ५० करोड ७१ लाख रुपैयाँ शेयर लोन प्रवाह गरेको छ, जुन अघिल्लो वर्षको तुलनामा २४.९२ प्रतिशतले बढी हो। दोस्रोमा ग्लोबल आइएमई बैंकले ११ अर्ब ६५ करोड ५७ लाख रुपैयाँ सेयर लोन प्रवाह गरेको छ, जसमा ६८.२४ प्रतिशतको वृद्धि देखिएको छ। तेस्रो स्थानमा रहेको कुमारी बैंकले ९ अर्ब १३ करोड ९४ लाख रुपैयाँ शेयर लोन प्रवाह गर्दै अघिल्लो वर्षको तुलनामा १२७.५२ प्रतिशतको तीव्र वृद्धि गरेको छ।

बिज्ञापन

सिद्धार्थ बैंकबाट ८ अर्ब ५२ करोड ३७ लाख रुपैयाँ, नेपाल बैंकबाट ७ अर्ब ८२ करोड ६४ लाख रुपैयाँ, प्राइम कमर्सिल बैंकबाट ७ अर्ब ७८ करोड ७१ लाख रुपैयाँ, सिटिजन्स बैंकबाट ६ अर्ब ८५ करोड १ लाख रुपैयाँ, लक्ष्मी सनराइज बैंकबाट ५ अर्ब २१ करोड ३८ लाख रुपैयाँ र राष्ट्रिय वाणिज्य बैंकबाट ४ अर्ब ८८ करोड ४४ लाख रुपैयाँ सेयर लोन गएको छ। अघिल्लो वर्षको यही अवधिसम्मको तुलनामा सिद्धार्थको सेयर लोन प्रवाह ५४.९९ प्रतिशत, नेपाल बैंकको ४३.६८ प्रतिशत, प्राइमको ८७.८८ प्रतिशत, सिटिजन्सको ५४.५१ प्रतिशत, लक्ष्मी सनराइजको ६०.७४ प्रतिशत र राष्ट्रिय वाणिज्य बैंकको १७.२७ प्रतिशतले बढेको छ।

प्रभु बैंकबाट ४ अर्ब ६५ करोड २१ लाख रुपैयाँ, नेपाल इन्भेस्टमेन्ट मेगा बैंकबाट ३ अर्ब २२ करोड ८९ लाख रुपैयाँ, कृषि विकास बैंकबाट ३ अर्ब ३ करोड ७४ लाख रुपैयाँ, एभरेस्ट बैंकबाट २ अर्ब ७७ करोड ५३ लाख रुपैयाँ र सानिमा बैंकबाट २ अर्ब ४५ करोड ४७ लाख रुपैयाँ सेयर लोन गएको छ। अघिल्लो वर्षको सेयर लोन प्रवाह प्रभु बैंकको ४४।६९ प्रतिशत, नेपाल इन्भेस्टमेन्ट मेगा बैंकको ५८.८१ प्रतिशत, कृषि विकास बैंकको १३६.५७ प्रतिशत, एभरेस्ट बैंकको ३५.४४ प्रतिशत र सानिमा बैंकको ५१.१२ प्रतिशतले बढेको छ।

चैत मसान्तसम्म केही बैंकहरूको सेयर लोन प्रवाहमा गिरावट पनि देखिएको छ। एनआईसी एसिया बैंक र हिमालयन बैंकको सेयर लोन अघिल्लो वर्षको तुलनामा क्रमशः ४१.७२ प्रतिशत र ०.७४ प्रतिशतले घटेको हो। यद्यपि एनएमबि बैंक, माछापुच्छ्रे बैंक र नेपाल एसबीआई बैंकले भने सेयर लोन उल्लेख्य दरले वृद्धि गरेका छन्। नेपाल एसबीआई बैंकको सेयर लोन प्रवाहमा सबैभन्दा बढी, अर्थात् ३८८.३२ प्रतिशतको वृद्धि भएको छ।

सेयर धितो कर्जामा यस्तो तीव्र वृद्धि हुनुले शेयर बजारप्रतिको लगानीकर्ताको आकर्षण बढेको देखिन्छ ।