ताजा
लोकप्रिय
चालु आर्थिक वर्ष २०८२/८३ को पहिलो तीन महिनामा नेपालको वैदेशिक व्यापार घाटा १२ प्रतिशतले बढेको छ। भन्सार विभागले आइतबार सार्वजनिक गरेको विवरणअनुसार साउन, भदौ र असोज महिनासम्मको अवधिमा आयात तथा निर्यात दुबै बढे पनि आयातको दर उच्च रहेकाले घाटा अझै बढेको हो।
बिज्ञापन
विभागका अनुसार तीन महिनामा ४ खर्ब ६८ अर्ब ८ करोड ३३ लाख रुपैयाँबराबरको वस्तु आयात भएको छ। अघिल्लो आर्थिक वर्षको सोही अवधिमा यो रकम ३ खर्ब ९० अर्ब ७५ करोड २३ लाख रुपैयाँ थियो। यसअनुसार आयातमा १९.७९ प्रतिशत वृद्धि भएको छ। त्यस्तै, ७२ अर्ब ७८ करोड २८ लाख रुपैयाँबराबरको वस्तु निर्यात भएको छ, जुन अघिल्लो वर्षको सोही अवधिको ३८ अर्ब ३७ करोड ८७ लाख रुपैयाँ को तुलनामा ८९.६४ प्रतिशतले वृद्धि भएको हो।
बिज्ञापन
यद्यपि निर्यातमा उच्च वृद्धि भए पनि आयातको परिमाण निकै ठूलो रहेकाले कुल व्यापार घाटा बढेको विभागले जनाएको छ। चालु आवको पहिलो तीन महिनामा व्यापार घाटा ३ खर्ब ९५ अर्ब ३० करोड रुपैयाँ पुगेको छ, जुन अघिल्लो वर्षको सोही अवधिको ३ खर्ब ५२ अर्ब ३७ करोड रुपैयाँ भन्दा १२.१८ प्रतिशतले बढी हो।
कुल वैदेशिक व्यापार भने २६.०४ प्रतिशतले वृद्धि भई ५ खर्ब ४० अर्ब ८६ करोड रुपैयाँ पुगेको छ। भन्सार विभागका अनुसार आयात–निर्यात अनुपातमा भने केही सुधार देखिएको छ। अघिल्लो वर्ष १०.१८ गुणा रहेको यो अनुपात चालु आवमा घटेर ६.४३ गुणामा पुगेको छ। विश्लेषकहरूका अनुसार निर्यात वृद्धिदर उत्साहजनक भए पनि आयात नियन्त्रणमा नआए नेपालको दीर्घकालीन व्यापार सन्तुलनमा सुधार गर्न चुनौती रहनेछ।
बिज्ञापन
