पोखराका विभिन्न रुटहरुमा चल्ने गाडीहरूमा जीपीएस जडान गरिने भएको छ। हरित यातायात प्रणाली विकास परियोजनाको पाइलोटिङ स्वरूप पहिलो चरणमा पोखराको लामाचौरदेखि छोरेपाटन रुटमा प्रविधि जडान गर्न लागिएको हो।

बिज्ञापन

यो रुटका ६ ठाउँमा प्रविधिसहितको बसस्टप निर्माण गरिने छ भने ४२ वटा बसहरूमा जिपिएस ट्रयाकिङ प्रविधि जडान गरिने छ। हरित यातायात प्रणालीका लागि आवश्यक सामाग्रीहरू डिसेम्बर २० भित्र काठमाडौँ आइपुग्ने र त्यसलाई पोखरा ल्याएर जडान गरिने महानगरले जनाएको छ। तोकिएका बस स्टपहरुमा इन्टरनेट र बिजुली बत्तीको व्यवस्थापन महानगरपालिका आफैले गर्नेछ। पहिलो चरणमा १८ करोड बराबरको सामाग्रीहरू कोरियाले उपलब्ध गराउने छ।

बिज्ञापन

यसको पाइलोटिङसँगै आगामी दुई वर्षभित्र महानगर भित्रको सम्पूर्ण सार्वजनिक यातायातलाई प्रविधिमैत्री बनाइने मेयर धनराज आचार्यले जानकारी दिए। परियोजना अन्तर्गत पोखराका ८४ वटा बस रुटका १ हजार २८६ ठाउँमा बस स्टप निर्माण गरिनेछ। यस्तै, ३ ठाउँमा बस टर्मिनल निर्माण हुने आचार्यले सुनाए। यो प्रणाली विकास गरेसँगै पोखरामा चल्ने सार्वजनिक यातायातको सेवाका बारे हरेक नागरिकहरूले डिजिटल माध्यमबाट जानकारी पाउने छन्। ‘यात्रुले लामो समय बस कुर्नुपर्दैन। चालकहरूले पनि जथाभाबी यात्रु चढाउन र ओराल्न पाउँदैनन्,’ उनले भने, ‘यसले पोखरामा समावेशी, दिगो र लचिलो यातायात प्रणालीको विकासमा टेवा पुग्छ।’

परियोजनामा कोरियाको भूमि, पूर्वाधार र यातायात मन्त्रालय, कोरिया रेलमार्ग अनुसन्धान संस्थान, राष्ट्रिय यातायात विश्वविद्यालय कोरिया र तारकम को. लिमिटेडसहित विभिन्न दातृ निकायहरूले साझेदारी गर्नेछन्। यसकै सन्दर्भमा कोरियाको तर्फबाट तारकम को।लिमिटेडका बिजनेस विभागका निर्देशक कि होन किमले मेयर आचार्यसँग बुधबार छलफल गरेका छन्। उनले एक महिनाभित्र सबै सामग्री नेपाल आइपुग्ने जानकारी गराए।

बिज्ञापन