रूपन्देहीको सिद्धार्थनगर नगरपालिका वडा नं. ३ स्थित एक होटलमा युवतीमाथि सामूहिक बलात्कार गरेको आरोपमा ६ जना पक्राउ परेका छन्।

बिज्ञापन

गत बिहीबार राति भएको उक्त घटनामा संलग्न भएको आरोपमा जिल्ला प्रहरी कार्यालय रूपन्देहीले दुई जना नेपाली र चार जना भारतीय नागरिकलाई पक्राउ गरेको हो। कार्यालयका प्रवक्ता एवं डिएसपी मनोहरप्रसाद भट्टका अनुसार गत बिहीबार भारतबाट घुम्न आएकी २१ वर्षीय युवतीमाथि सामूहिक बलात्कार गरेको भन्दै प्रहरीमा जाहेरी दर्ता भएको छ।

बिज्ञापन

पीडित युवतीले आफूहरूसँगै आएका ती पुरूषले बलात्कार गरेको भन्दै जाहेरीपछि अनुसन्धान अघि बढाइएको डिएसपी भट्टले बताए। पक्राउ पर्नेहरूमा भारतको महाराजगञ्ज जिल्लाका ३७ वर्षीय अफरोज समी, ३१ वर्षीय अत्तर रजा, २७ वर्षीय सालु खान र गोरखपुरका २७ वर्षीय बब्लु खान छन्। त्यस्तै रुपन्देहीको ओमसतिया गाउँपालिका-४ का ३२ वर्षीय सारुख तेली र अकबर खान पनि प्रहरीको हिरासतमा छन्। उनीहरूमाथि थप अनुसन्धानका लागि जिल्ला अदालत रूपन्देहीबाट सात दिन हिरासतमा राख्न प्रहरीले अनुमति लिएको छ। एक महिना पहिले रुपन्देहीकै कोटहीमाइकी एक किशोरीमाथि भएको सामूहिक बलात्कारको घटना छानबिन भइरहँदा अर्को घटना बाहिरिएको हो।

गत भदौ ५ गते कोटहीमाई गाउँपालिका-६ का मुकेश चौधरीले तालिममा सहभागी गराउने भन्दै एक किशोरीलाई होटलमा पुर्‍याएका थिए। होटल पुर्‍याएर मुकेशसहित अन्य दुई जना मिलेर सामूहिक बलात्कार गरेको भन्दै पीडितले प्रहरीमा जाहेरी दिएकी थिइन्। उक्त घटनामा संलग्न भएको आरोप लागेका तीनै जनामाथि आवश्यक अनुसन्धान पुरा गरी मिसिल जिल्ला सरकारी वकिलको कार्यालयमा बुझाइसकिएको डिएसपी भट्टले बताए।

बिज्ञापन