मालपोत कार्यालय पर्सामा जग्गाको लिखत पास गरेको ११ करोड १० लाख ३९ हजार ९ सय ५० रुपियाँ राजस्व सरकारी खातामा दाखिला नगरी पाँच जना मालपोत अधिकृतहरुले आफै हिनामिना गरेको पाइएको छ ।

बिज्ञापन

पाँचजना मालपोत अधिकृतहरुले एकै किसिमबाट रकम हिनामिना गरेको हो। आर्थिक वर्ष २०७१-०७२ मा मालपोत कार्यालय, पर्साको रजिष्ट्रेशन फाँट ‘ग’ का कर्मचारीहरूको मिलेमतोमा जग्गा किनबेचका क्रममा विभिन्न लिखतबाट उठेको राजस्व रजिष्ट्रेशन दस्तुर र पुँजीगत लाभकर रकम नियमानुसार दाखिला नगरी हिनामिना गरेको पाइएको हो।

बिज्ञापन

अख्तियार दुरुप्रयोग अनुसन्धान आयोगले उक्त कार्यमा संलग्न तत्कालीन मालपोत अधिकृहरु क्रमशः हरिनारायण मिश्र, भूपबहादुर बोगटी, गोपालबहादुर ढुङ्गाना, पदमप्रसाद अर्याल, चन्द्रबहादुर भण्डारीसहित कम्प्युटर अधिकृत कमोद तिवारी र नायब सुब्बा किरण प्रसाद उपाध्यायविरुद्ध विशेष अदालतमा सोमबार मुद्दा दायर गरेको छ ।

आयोगका सहायक प्रवक्ता देवीप्रसाद थपलियाका अनुसार मिश्रले २०७१(७२ मा मालपोत कार्यालय, पर्साको फाँट ‘ग’ को एकै रजिस्ट्रेसन नम्बरको एकभन्दा बढी लिखत पारित गरेको थियो। सोमध्ये बढी राजस्व रकम उठेको लिखतको विवरण रजिष्ट्रेशन लिखत दर्ता किताबमा प्रविष्टि गरी किताबमा प्रमाणित गर्नुपर्नेमा रजिस्ट्रेसन दर्ता किताब प्रमाणित नगरी आफनै खातामा जम्मा गरेको आयोगको प्रारम्भिक अनुसन्धानले देखाएको छ।

बिज्ञापन

मिश्रको हस्ताक्षरबाट पारित भएका लिखतबाट संकलन भएको दुई करोड ९ लाख ३१ हजार ६ सय ४७ रुपैयाँ राजस्व चुहावट भएको आयोगले जनाएको छ। उनी विरुद्ध बिगो कायम हुन गरी भ्रष्टाचार निवारण ऐन,२०५९ को दफा ३ को उपदफा ९१० बमोजिम जरिवाना र सोही ऐनको दफा ७ बमोजिम राजस्व हिनामिना भएको रकमको दोब्बर जरिवानाको माग दाबी लिइएको आयोगका प्रवक्ता थपलियाले बताए।

अर्का मालपोत अधिकृत बोगटी, ढुाना, अर्याल, भण्डारी, कम्प्युटर अधिकृत तिवारी र नायब सुब्बा उपाध्यायले पनि मिश्रको जस्तै एकै रजिस्ट्रेसन नम्बरको एकभन्दा बढी लिखत पारित गरेको र लिखतहरू दर्ता किताबमा प्रविष्टि गरी प्रमाणित गर्नुपर्नेमा रजिस्ट्रेसन दर्ता किताब प्रमाणित नगरी निजको हस्ताक्षरबाट पारित भएका लिखतबाट संकलन भएको राजस्व हिनामिना गरेको अदालतमा दायर अभियोगपत्रमा भनिएको छ।

सहायक प्रवक्ता थपलियाका अनुसार बोगटीले एक करोड ४९ लाख ६९ हजार एक सय ४५ रुपियाँ, ढुानाले ३५ लाख ४५ हजार ९ सय ५० रुपियाँ, अर्यालले १६ लाख ८१ हजार ६ सय रुपियाँ, भण्डारीले दुई लाख ४४ हजार चार सय ६२ रुपियाँ, तिवारीले एक करोड ४१ लाख एक सय ७१ रुपियाँ र उपाध्यायले पाँच करोड ५५ लाख १९ हजार ९ सय ७५ रुपियाँ राजस्व हिनामिना गरी भ्रष्टाचार गरेको अभियोगपत्र उल्लेख गरिएको छ । उनीहरुविरुद्ध पनि मिश्रको जस्तै अभियोग लगाएर मुद्दा दर्ता गरिएको छ ।

उपाध्यायको हकमा भने उनी र उनकी श्रीमतीको मृत्यु भइसकेकाले अंश खाने अंशियार छोराहरू राजकिशोरप्रसाद उपाध्याय, गौतमप्रसाद उपाध्याय, पशुपतिप्रसाद उपाध्याय र मुरारीप्रसाद उपाध्याय देखिएको हुँदा उनीहरूबाट दामासाहीले असुलउपर गर्ने प्रयोजनका लागि मात्र प्रतिवादी कायम गरिएको जानकारी थपलियाले दिए।

कसले कति हिनामिना गरे ?

किरणप्रसाद उपाध्याय ५ करोड ५५ लाख १९ हजार ९ सय ७५
हरिनारायण मिश्र २ करोड ९ लाख ३१ हजार ६ सय ४७
भूपबहादुर बोगटी १ करोड ४९ लाख ६९ हजार १ सय ४५
कमोद तिवारी १ करोड ४१ लाख १ सय ७१
गोपालबहादुर ढुङ्गाना ३५ लाख ४५ हजार ९ सय ५०
पदमप्रसाद अर्याल १६ लाख ८१ हजार ६ सय
चन्द्रबहादुर भण्डारी २ लाख ४४ हजार ४ सय ६२

– समाचारपत्रबाट साभार ।